التاخر في النطق...

اولا يعلم الله ان كل ما اكتبه فى المنتدى يكون للافادة و ابتغاء وجه الله سبحانه و تعالى ف انا حبيت اكتب لكم تجربتى فى تأخر النطق لكى تستفيدوا و لو بالقليل

ثانيا سامحونى ان كان الموضوع طويل فمن يهمها الامر ستقرأه للنهاية لانى كما قلت انا اكتبه للافادة

ثالثا رجاء لكل من تدخل ان تدعو لابنى ليس الدعاء بالكتابة هنا و لكن دعاء من قلبها
يارب أهدى ياسين رب أشرح له صدره و يسر له أمره و أحلل عقدة من لسانه
اللهم اجعله تقيا زكيا سليما معافى بارا بوالديه و من الصالحين المصلين الذاكرين
اللهم كما حسنت خلقه فحسن خلقه يارب العالمين اللهم آآآآآآآآآميييييييييين

تبدأ القصة با أخواتى بأن ابنى كان من يوم ما اتولد و الحمدلله كل شئ ماشى طبيعى
يعنى اسنانه ظهرت فى وقتها و بدأ الزحف و المشى فى وقت مناسب و الانتباه و المناغاة و كل شئ فى نموه و تطوره ماشى زى كتب الاطفال ما بتقول
و هو عمره 11 شهر لقيته بيقول ببببب دددد و الحروف الاولى اللى بيقولها الاطفال و طبعا فرحت جدااااااااااا
و مع الوقت الامر لم يتطور و بدأت اقلق
و عند سن سنة و نص ما قدرتش اتحمل اخدته و روحت عند دكتور تخاطب هنا فى ابوظبى
طبعا كل الناس اللى فى العيادة كانوا مستغربين و قالولى ده صغير اوى و خصوصا لما عرفوا انه ابنى الوحيد و احنا فى غربة و مالناش حد هنا يعنى مافيش اختلاط مع اطفال
حتى الدكتور استغرب و قعد يسألنى شوية اسئلة و قالى لغاية دلوقتى يعتبر الوضع طبيعى و قالى اتكلم معاه كتير و اقول اسماء الاشياء و حاجات كده و ارجع له بعد شهرين
المهم رغم انى عارفة ان ابنى بيسمع الحمدلله روحت عملتله تخطيط سمع و الحمدلله طلع سمعه ممتاز و لله الحمد

المهم بعدها نزلت مصر و اخدته و روحت عند دكتورة تخاطب كان عمره وقتها سنة و 8 شهور
دى بقى عملتلى البحر طحينة اول ما دخلنا الغرفة الولد قعد يجرى و يتشاقى زى اى طفل قالتلى من اول دقيقة ده ما عندوش تواصل بصرىو هايبر و مش عارف ايه خلتنى خارجة من عندها و دموعى دى سيووووووووووووول
لا و اللى زاد على كده السكرتيرة عندها من قبل الكشف تقولى انا خايفة يكون عنده توحد يعنى بالله عليكم سكرتيرة تعرف ايه فى التوحد و لا مش توحد ( بشروا و لا تنفروا )
المهم الدكتورة كشفت على ودنه و حنجرته و لسانه قالتلى الحمدلله اجهزة النطق سليمة و لسانه مش مربوط
طلبت منى اعمله شوية اختبارات عندها فى المركز المهم الولد كان بيبكى لانهم عايزين ياخدوه فى غرفة لوحده مع اخصائية و ما استجابش لاى اختبارات
الا اختبار الذكاء لانى كنت معاه و الحمدلله طلع ذكاؤه مناسب لعمره و الاخصائية اللى عملتله الاختبار قالتلى ابنك الحمدلله كويس جدااااااااا خديه و امشى من هنا لانهم عايزين يستغلوكى

و فعلا اخدت الولد و مشيت و رجعت الامارات تانى و استمر الحال على ما هو عليه
الولد الحمدلله بيسمع و بيفهم كلامى يعنى اقفل الباب هات منديل يالا نروح باى يعنى زى كل الاطفال
انما نطق مافيش غير كلمة بابا و هااااام يعنى عايز يأكل
لما ابنى تم السنتين اخدته و رجعت تانى للدكتور اللى روحتله فى الامارات و قاللى نفس الكلام ان الوضع لسا طبيعى و تأخر لغوى عادى

بعدها بفترة وديته لاخصائى تانى فى مستشفى قعد معانا يادوب اقل من 10 دقايق و ما كشفش على الولد و لا حتى لمسه و كان تقريره ان الولد هايبر اكتيف و ممكن يكون ما بيسمعش كويس (مع انى قايلاله انى عاملة اختبار سمع) و ممكن يكون لسانه مربوط (مع ان الدكاترة اللى كشفوا عليه قبل كده قالوا لسانه سليم الحمدلله) و قال انه محتاج جلسات تخاطب و علاج وظيفى و تعديل سلوك و تخيلوا قرركل ده من غير اى نوع من انواع الكشف
طبعا انا خرجت من عنده و رميت كلامه فى اقرب باسكيت و لا كأنى سمعته لانى حسيت انه ما عندوش ضمير و بيفترى على الولد و بيقول اى كلام و خلاص حسبى الله و نعم الوكيل

طبعا بالى ما ارتاحش نهاااااااااااائى كل ما اشوف ابنى بيشاور على حاجة و مش قادر يتكلم و يقولى اه اه اه قلبى بيتقطع
جيت فى رمضان اللى فات ابنى كان عنده سنتين و نص بكيت كتير و استخرت ربنا و قلت لجوزى ندور على دكتور تانى
ف سألنا و الناس دلونا على مركز متخصص فى مشاكل النطق و اخدت الولد و روحت
كشف عليه اخصائى هناك و عمله شوية اختبارات و برضو الحمدلله قال لنا ان الولد ما عندوش اى تاخر عقلى بفضل ربنا سبحانه و تعالى و اجهزة النطق سليمة و ان هو محتاج بس لجلسات تخاطب بمعدل ساعة يوميا

يعنى دلوقتى بعد كل التشخيصات اللى قالوها الدكاترة كلهم فى النهاية اجمعوا على حاجة واحدة بسسسسسسسسس و هى ان الولد عنده فقط تأخر لغوى و هذا التأخر بدون سبب وراثى او عقلى او عضوى و لله الحمد من قبل و من بعد

رجاء عدم الرد يتبع ان شاء الله

و من هنا بدأت الحكاية فعلا
بدأ ابنى يروح المركز ده بيقعد ساعة مع اخصائى تخاطب و بعدها بينزل فصل موجود فى المركز زى حضانة كده
بيلعب و بيلون و بيرسم و بياكل و بيقولوا اناشيد هكذا

المهم الجلسات دى فى الاول بتكون مجرد انهم يستخرجوا اصوات من الطفل عن طريق الالعاب زى النفخ و الشفط و حاجات زى كده
و بدأوا يخرجوا منه حروف المد زى أااااااااااا أوووووووو أىىىىىىىى
و بعدها بفترة بدأوا يعلموه الكلمة على مقطعين
يعنى مثلا كلمة قطة احنا بننطقها أوطا فهو اتعلم يقول أووو طااااا
الاخصائى بيسجل الجلسة بالفيديو و طبعا لا تتخيلوا مدى سعادتى لما ورانى الفيديو و ابنى بيقول اوووو طاااااااااا
او مثلا بطة باااااطاااااااااااا
طرت من الفرحة ما كنتش مصدقة نفسى
و طبعا بيعلموه كمان صورة القطة عشان ما يبقاش بغبغان بيردد و خلاص

و الحمدلله الحمدلله الحمدلله بفضل من رب العالمين و فى خلال 3 شهور ابنى حصيلته اللغوية تحولت من كلمة واحدة بس الى حوالى 25 كلمة مع معرفة صورهم ما شاء الله و لا قوة الا بالله ما شاء الله و لا قوة الا بالله و لله الحمد من قبل و من بعد

و طبعا ابنى فى الاول كان بس بيقول الكلمات اللى بيتعلمها فى المركز و لما انا اطلب منه انه يقول
بعدها بدأ لما يشوف الحاجة يقول لوحده يعنى لما يشوف قطة فى الشارع يقول اسمها
بعد كده بدأ يلقط منى او من التلفزيون بعض الكلمات
يعنى الموضوع كان بالتدريج و اخد وقت
و المرحلة الجاية ان شاء الله انه يبدأ يقول جمل مش بس كلمات باذن الله دعواتكم

طبعا هتقولولى يعنى انتى مش عارفة تعملى الشويتين دول و تنطقيه
و الله الموضوع مش بالبساطة انى انا اعلمه
و المثل بيقول أدى العيش لخبازه
يعنى ينفع الطفل يذاكر فى البيت من غير ما يروح المدرسة
ما ينفعش لازم يروح المدرسة يتعلم و يرجع البيت يراجع

[center]دى بقى بعض الحالات شوفتها هناك بس احب اقول انى طبعا مش متخصصة و التشخيص بتاع كل حالة سمعته من امهاتهم او من العاملين فى المركز

حالة (ز) ولد عنده حوالى 6 سنوات مصاب بالشلل الدماغى
اول ما راح المركز كان مش بيتكلم و طبعا مش بيمشى و لا بيحرك اى عضلة من عضلات جسمه
بس الحمدلله مع العلاج بدأ يمشى و يتحرك و يطلع السلم
يعنى فى بعض الناس ممكن يتركوا الطفل اللى زى ده حتى يقضى الله امرا كان مفعولا لكن المفروض انهم يساعدوهم انهم يعيشوا حياتهم بصورة طبيعية

حالة (ح) ولد عمره 4 سنوات
ما كانش بيتكلم خااااالص و امه قالت عادى ما اخوه الكبير اتاخر فى الكلام و بعدها اتكلم لوحده
و لما تم 4 سنين قدمت له فى المدرسة و هناك رفضوه لانه مش بيتكلم ساعتها فاقت و اخدته على المركز و اكتشفت انه لا حول و لا قوة الا بالله عنده توحد
يعنى لو كانت اخدته من بدرى كان الولد اتحسن كتير

حالة (س) ولد عمره حولاى 5 سنوات
الاب من جنسية و الام جنسية اخرى و لكن الاتنين عرب
اتخانقوا يعلموا الولد لهجة بلد الام و لا لهجة بلد الاب و فى النهاااااااااية اتفقوا يعلموه انجليزى فقط
و نهاية النهاية ان الولد جاله حالة تشتت و ما بينطقش لا ده و لا ده
بالذمة ده كلام؟؟؟؟؟؟؟؟؟؟؟؟؟

حالة (ف) طفلة منغولية عمرها سنة و كم شهر
الطفل دى عاملة عملية خطيرة فى القلب و ف يوم سكرتيرة المركز لقيت ام (ف) بتتصل بالمركز و بتسال بتقول بنتى عاملة ايه
السكرتيرة قالتلها ليه مالها هى البنت فيها حاجة
ردت الام و قالت اه يا حرام طول الليل سخنة و تعبانة و ما نامتش
السكرتيرة قالتلها و لما هى كده بعتيها المركز ليه النهاردة (البنت بتروح بالباص)
ردت الام و قالت انا قلت ابعتها تنام عندم
السكرتيرة قالت لها و ما تنامش فى البيت ليه
ردت الام و قالت اصلى مش فاضية عايزة انزل اتسوق
و فعلا السكرتيرة دخلت الفصل لقيت المدرسة بتقول ان البنت من لحظة ما وصلت و هى نايمة يا حرام
لا تعليق !!!!!!!!!!!!!!!!!

حالة (ل) ولد عمره 7 سنوات
لغاية ما كان عمره 5 سنوات كان عادى و بيتكلم و فجأة توقف عن الكلام
بس الاهل ما لاحظوش التوقف ده الا بعد سنتين و اكتشفوا انه عنده توحد
ازاى سنتين الولد ساكت و الاهل مش واخدين بالهم ؟؟؟؟؟؟؟؟؟!!!!!!!!!!!

[/center]

اكيد يا بنات انتوا مستغربين ليه كل الرغى اللى انا رغيته ده كله
اولا انا عايزة اوصل لكل ام انك لازم تنتبهى على ابنك و لو حسيتى بأى حاجة مش مظبوطة اسالى و استشيرى و ما تسكتيش لانه الطفل ده مالوش غيرك يخاف عليه
اذا ما كنتيش انتى امه تحسى بيه و تخافى عليه و تلاحظى اى تغير لا قدر الله مين اللى هياخد باله غيرك
و هو طفل لا حول له و لا قوة لا يعلم من الدنيا الا انتى
يعنى الحمدلله نفسية ابنى دلوقتى نفسيته احسن لما بدأ ينطق و انا كمان و ابوه نفسيتنا احسن الحمدلله
يعنى ناس كتير قعدوا يقولولى استنى بكرة يتكلم لوحده و تزهقى بس كنت هستنى لحد امتى لحد ما ييجى داخل المدرسة و ما يقبلوهوش لانه مش بيتكلم

ثانيا لو الموضوع خطير لازم تروحى لاكتر من دكتور لان زى ما شفتوا كل واحد فيهم بيفتى و قاللى تشخيص غير التانى اللى قال هايبر و اللى قال توحد و اللى قال ما بيسمعش و اللى قال لسانه مربوط
لكن اللى اجمعوا عليه كللللللللللللهم فى النهاية انه تاخر لغوى محتاج جلسات تخاطب بسيطة فقط لا غير و لله الفضل و المنة

اما بقى السبب التالت اللى خلانى اكتب الموضوع هو المركز اللى ابنى بيروحه دلوقتى
اولا احب اشكر جدااااااااااااا جدااااااااااااااا الست صاحبة المركز ربنا يباركلها و يجازيها كل خير
يعنى بصراحة الست دى بتعمل خير كتييييييييير جدااااااااااااااا ربنا يجعله فى ميزان حسناتها
يعنى فى اطفال لا حول و لا قوة الا بالله حالاتهم صعبة جدااااااااااا فى المركز سواء من الناحية المادية او الحالة المرضية ف هى بتخليهم يدخلوا المركز بدون اى رسوم يعنى ما بيدفعوش و لا مليم مع ان العلاج مكلف جداااااااااا لان فى حالات مهم بتحتاج جلسات تخاطب و تعديل سلوك و علاج طبيعى لا حول و لا قوة الا بالله و حتى الباص بيوصلهم مجانا
طبعا الكلام ده انا عرفته من امهات الاطفال دول
كمان تخيلوا كل يوم خميس بتفرح الاطفال كل الاطفال اللى فى المركز بياخدوهم رحلة للملاهى او الحديقة و يجيبولهم وجبة او يعملوا لهم حفلة مثلا عيد ميلاد طفل منهم او حفلة تنكرية او العيد الوطنى و يصوروهم و يجيبولهم عصير و حلويات و كللللللللللللللللللللللللل ده ببلاش من غير و لا مليم لكل الاطفال القادرين و غير القادرين (و الله دموعى نزلت و انا بكتب الكلام ده لانك مش متخيلين فرحت الاطفال اد ايه فى اليوم ده)

و كمان انا لما روحت المركز ده حمدت ربى مليون مررررررررررررة على شوية التأخر اللغوى اللى عند ابنى لان الاطفال اللى هناك لا حول و لا قوة الا بالله اللى عنده توحد و اللى منغولى و اللى عنده شلل دماغى لا حول و لا قوة الا بالله
يعنى فعلا و الله لو كل واحدة حاسة ان ابنها جسمه ضعيف او مش بياكل او عنده شوية حساسية او كذا او كذا تحمد ربنا لان فى امهات تانيين قلوبهم بتتعصر على اولادهم من امراض مافيش منها شفاء ربنا يصبرهم
ياريت لما نشوف طفل منغولى او مريض باى مرض عقلى نقول الحمدلله الذى عافنا مما ابتلى به غيرنا و فضلنا على كثير ممن خلق تفضيلا
و نحاول نساعد المراكز اللى بتراعى الاطفال دول لانهم مليانيين براءة و طهارة ربنا يشفيهم يارب

لا تنسوا ان تأمنوا على دعائى
يارب أهدى ياسين رب أشرح له صدره و يسر له أمره و أحلل عقدة من لسانه
اللهم اجعله تقيا زكيا سليما معافى بارا بوالديه و من الصالحين المصلين الذاكرين
اللهم كما حسنت خلقه فحسن خلقه يارب العالمين
اللهم اشفى كل اطفال المسلمين يارب العالمين اللهم آآآآآآآآآميييييييييين

واو روعة تسلمي ياقمر